જાદુની ઝપ્પીની શક્તિને ઓળખવામાં મોડું કરવા જેવું નથી

જાદુની ઝપ્પીની શક્તિને ઓળખવામાં મોડું કરવા જેવું નથી

એક સાત આઠ વર્ષના બાળકને એની માતાએ પૂછ્યું, ‘ બેટા હોસ્પિટલમાં દાખલ થયેલા તારા મિત્રની મમ્મીને મળીને તે શું કર્યું ? ‘ ત્યારે નાનકડા પુત્રએ સાહજિકતાથી કહ્યું, ‘ કશું ખાસ નહીં મમ્મી, મેં પહેલા તો આંટીના ખોળામાં બેસીને એમને રડવામાં મદદ કરી. પછી એમને ભેટીને એમના આંસુ લૂછવાનું કામ કર્યું. ‘ આ નાના બાળકે કોઇ મનોવૈજ્ઞાનિક ઇકવેશનનો અભ્યાસ કર્યો ન હતો. પણ એણે માનવ સહજ સ્વભાવમાં પડેલી જાદુની જપ્પીની શક્તિનો અસરકારક ઉપયોગ કર્યો. એણે અકસ્માતમાં ગંભિર રીતે ઘવાયેલા પુત્રની માતાને દરિયો ભરીને વહાલનુ બળ આપ્યું.

કોઈ જ્યારે લાગણીપૂર્વક ગળે મળે છે ત્યારે સૌથી શક્તિશાળી હકારાત્મક ઊર્જા પેદા થતી હોય છે. ઉષ્માપૂર્વક ‘હગીંગ’ કરવાથી હૃદયમાં પડેલી નકારાત્મક વિષમતાના વાદળોને ઝડપથી વીખરાવાનો અવસર મળે છે. મનમાં શાતા વળે છે. મન-મસ્તિષ્કમાં જ્ન્મેલા ઉદ્વેગોને આનંદના નવા માર્ગો દેખાવા માંડે છે. એક પણ શબ્દની આપ-લે વગર જ્યારે પોતાની જગા ઉપરથી ઉભા થઈને બે હાથ પહોળા કરી બીજાને જાદૂની જપ્પી આપવામાં આવે ત્યારે દુઃખમાં ડૂબેલા વ્યક્તિમાં હુંફનો અનેરો અનુભવ થતો હોય છે. એક ઉષ્માસભર આલિંગન હજારો શબ્દોની ગરજ સારતું હોય છે. એવું જરૂરી નથી કે માત્ર દુઃખમાં જ કોઈને ‘હગ’ કરીને એની મુશ્કેલીમાં શાતા આપવી જોઈએ. ગમે તે સમયે, આકસ્મિક રીતે પણ જ્યારે બે વ્યક્તિ ખુલ્લા મને એકમેકને ગળે મળે ત્યારે હકારાત્મક ઊર્જા બેવડાઈને ખુશીઓનુ સપ્તરંગી આકાશ બનાવી દે છે.

એક ભાઈ એના યુવાન પુત્રને સપ્તાહમાં બે-ત્રણ વાર કોઈને કોઈ પ્રસંગે ઉષ્માથી બાહોમાં લઈને ‘હગ’ કરી જ લે. દીકરાને પણ પિતાની આ પેટર્ન ખૂબ ગમતી. બાપ-દીકરાની ઉષ્માસભર વર્તણૂક એમના પ્રેમ અને વાત્સલ્યને ટનબંધ વધારવા માટેનું ઈંધણ બની રહેતી. માણસ કમાવાની લ્હાયમાં અને મોટપણની ઠાલી ઈમેજને કારણે આટલી તદ્દન સાહજિક અને મોસ્ટ ઇફેક્ટિવ વર્તણૂક નથી કરી શકતો. મનમાં પડેલા પ્રેમના પંખીને પાંખો ફફડાવીને બહાર લાવવા એક નાનકડી શરૂઆત કરવી પડે. આના માટે કોઇ બહુ મોટા સઘન પ્રયાસો ક્યાં કરવાના છે ? માત્ર એક વાર એક નાનકડી વાતનો સ્વીકાર કરી આગળ આવીને કોઇને ગળે મળી જવાનું છે. ઇમાનદારીપૂર્વક મનથી નક્કી કરવુ પડે કે, મારે શબ્દોથી પણ આગળ જવું છે. મારે અહેસાસની પરિભાષાને વધુ બળવાન બનાવવી છે. પછી જુઓ હકારાત્મક વિચારની તાકાત નકારાત્મક વિચાર કરતા પરિસ્થિતિને કેવો મઝાનો વળાંક આપે છે.

જો વ્યક્તિ નક્કી કરે કે આખા દિવસ દરમિયાન તેને મળતા લોકોને તે એનામાં પડેલી ઉષ્માસભર ઊર્જાનો અહેસાસ કરાવશે તો સ્વભાવિક રીતે તે પોતે અંદરથી પ્રફુલ્લિત બનશે. સાથોસાથ સામેવાળા વ્યક્તિને પણ આનંદનો અહેસાસ કરાવી શકાશે. સામેવાળી વ્યક્તિ પુત્ર, પુત્રી, પત્ની કે પતિ હોય, મિત્ર હોય કે પછી સાથી કર્મયોગી કે પછી કોઇ પણ હોય. એકવાર ઉષ્માસભર વર્તનનો સંદેશો વહેવડાવવાની કોશિષ તો કરી જુઓ ! એક પહેલ કરી તો જુઓ ! કોઇની મુશ્કેલી કે નિષ્ફળતામાં એની પડખે ઉભા રહી હિંમત આપવાની ફીલ જુદી હોય છે. નિષ્ફળતા એ કોઈ જીવંત વ્યક્તિ નથી. નિષ્ફળતામાં કોઇની સાથે લાગણીપૂર્વક ગળે મળીને નિષ્ફળતાનો ભાર દૂર કરવાનો પ્રયાસ એક નવતર ઊર્જાનો સ્ત્રોત બની જતો હોય છે.

જ્યારે વ્યક્તિ મિત્રોની શોધ કરવા નીકળી પડે ત્યારે એને અહેસાસ થતો હોય છે કે એના દોસ્તો તો બહુ ઓછા છે. માત્ર આંગળીને વેઢે ગણી શકાય એટલા જ મિત્રો છે. જો વ્યક્તિ પોતે જ મિત્ર બનવાની ક્વોલિટિ ડેવલપ કરે તો એના હજારો મિત્રો બનતા જાય છે. એક ભાઈની મિત્રો બનાવવાની કુનેહની ખુબ સરસ. આ ભાઈ શહેરમાં એમના પરિચિત પૈકી જેનો પણ જન્મદિવસ હોય એમને ત્યાં પહોંચી જાય. એક ફુલ આપે અને ખૂબ ઉષ્માપૂર્વક દિલથી ગળે મળે. આ ભાઈમાં જન્મદિવસે ફૂલ આપીને ગળે મળવા ઉપરાંત એક બીજી પણ ક્વોલિટી છે. તેમના પરિચિત વ્યક્તિના જીવનમાં કોઈ મુશ્કેલી આવે કે પછી બિમાર હોય ત્યારે તો અચૂક પહોંચી જઈ લાગણીપૂર્વક ભેટે. આમ કરવાથી તેમના પરિચિતનું દુઃખ સ્વાભાવિક રીતે હળવું બની જાય. આ ભાઈ તેમના જીવનમાં ‘હગીંગ ટેકનિક’થી ખૂબ મોટી માત્રામાં મિત્રોનો પ્રેમ સંપાદિત કરી શક્યા છે.

સામાન્ય રીતે વ્યક્તિની સૌથી મોટી નબળાઈ નવું ન સ્વીકારવાની હોય છે. પહેલું ડગલું માંડવાની જ મુશ્કેલી છે. શરૂઆત કરવાની જ કઠણાઈ હોય છે. જ્યારે વ્યક્તિ ખૂબ વિચાર કરે ત્યારે બહુ થોડું અમલમાં મૂકી શકે છે. વ્યક્તિ પાસે અભિવ્યક્તિની બહુ મોટી તાકાત છે. એને કેવી રીતે નજરઅંદાજ કરી શકાય ? કોઈના જીવનમાં ઉષ્માસભર પ્રેરણા પૂરી પાડવા માટે માનવીય સંવેદના જેવું શક્તિશાળી મધ્યમ બીજું એકેય નથી. કર્તવ્યની ભાવના કાર્યને સારી રીતે કરવામાં ચોક્કસ ઉપયોગી થતી હોય છે. એક ઉષ્માસભર આલિંગન જોમ અને ઉત્સાહ સાથે કાર્યમાં હૂંફનો હાશકારો ભરી દે છે.

કોઈપણ વ્યક્તિ એના જીવનમાં કેવી પછડાટ ખાય છે કે કેટલો નીચે પડે છે એ અગત્યનું ક્યારેય નથી હોતું. પરંતુ એની પછડાટના સમયે કોણ આગળ આવીને એને ગળે લગાવે છે, પ્રેમસભર ઊર્જા આપે છે, એને ફરી પાછો બેઠો કરે છે એ જ સૌથી અગત્યનું છે. થોડા સમય પહેલા આવેલી બોલીવુડની ફિલ્મ મુન્નાભાઈ એમબીબીએસનો પેલો સીન યાદ છે ? કોલેજના કોરિડોરમાં સ્વીપર પોતું કરતો હતો. મુન્નો એણે સાફ કરેલી જગા ઉપર ચાલતાં એ સ્વીપર ભયંકર ગુસ્સે થઈ જાય છે. મુન્નો એને ભેટી પડે છે. એ ગુસ્સેલ સ્વીપર ભાવવિભોર બની જાય છે. બસ એ સીન બાદ ગળે મળવાની રસમને 'જાદૂની જપ્પી' એવુ મઝાનું નવું નામ મળી ગયું.

મનોચિકિત્સકો અને સંશોધકો જાદુની ઝપ્પીને શારીરિક અને માનસિક સ્વાસ્થ્ય માટે અકસીર ઈલાજ માને છે. ચિકિત્સકોએ સમર્થન આપ્યું છે કે, હાઇ બ્લડપ્રેશરના દર્દી માટે જાદુની જપ્પી ખૂબ અસરકારક છે. હૃદયમાં પડેલા છુપા ડરને પણ એ દૂર કરે છે. મનોવૈજ્ઞાનિકો કહે છે કે, તકલિફના સમયમાં મિત્રોને, પત્નીને, પતિને, બાળકોને સગાને કે પછી પાલતુ જાનવરને કોઈને પણ ગળે મળવાથી ટેન્શનની માત્રામાં ખુબ ઝડપથી ઘટાડો થતો હોય છે. ડિપ્રેશન દૂર કરવામાં ‘હગીંગ થેરેપી’ ઉત્તમ ઈલાજ છે. આજે આખા વિશ્વમાં ‘હગીંગ ટેકનિક’ને ‘પોઝિટિવ એનર્જી બુસ્ટર’ તરીકે લોકો સ્વીકારી રહ્યા છે. નર્વસ સિસ્ટમ બેલેન્સ કરવામાં ‘જાદુની જપ્પી’ અકસીર ઈલાજ છે. કેવિન ઝાબોર્ની નામના અમેરિકને પ્રતિ વર્ષ જાન્યુઆરીની ૨૧મીને ‘નેશનલ હગીંગ ડે’ તરીકે ઉજવવાની ૧૯૮૬માં પહેલ વહેલી દરખાસ્ત રજુ કરી. જોકે કેવિન નિખાલસતાથી સલાહ આપતા એ પણ કહે છે કે, જપ્પી આપતાં પહેલા સામેવાળાની સંમતી ચકાસી લેવી હિતકારી છે. જાદુની ઝપ્પીની શક્તિને ઓળખવામાં હવે બહુ મોડું કરવા જેવું નથી. શારીરિક અને માનસિક બંને એંગલથી આ એક અત્યંત ફાયદાકારક સોદો છે. ખુલીને ખુલ્લા દિલે જાદૂની જપ્પી આપો અને મેળવો. પણ હા, એટલું ચોક્કસ ધ્યાન રાખજો કે જાદુની જપ્પીમાં સચ્ચાઈ અને અચ્છાઈ હોવી જરૂરી છે. જો એમાં એક ટકો પણ લુચ્ચાઈ હશે તો ફાયદા કરતાં નુકસાન થવાની સંભાવના વધુ છે.

ધબકાર :

વિનિંગ લાઈન પછી વધારાના માઇલેજ ઉપર ક્યારેય કોઈ સ્પર્ધા કે ટ્રાફિક જામ નથી હોતો.

https://www.gandhinagarsamachar.com/wp-content/epaper/may2019/14052019-4.pdf